মঙলবাৰে মেটাই প্ৰধানমন্ত্ৰী নৰেন্দ্ৰ মোদীৰ ভিডিঅ’ ফেচবুকত ব্লক কৰাৰ সন্দৰ্ভত এক বিবৃতি প্ৰকাশ কৰি কয় যে কন্টেন্টটো “ভুলতে আঁতৰাই দিয়া হৈছে”। লগতে মেটাই ভিডিঅ’টো পুনৰুদ্ধাৰ কৰা বুলিও উল্লেখ কৰে । ইয়াৰ কিছু সময়ৰ পিছতে তথ্য আৰু প্ৰযুক্তি মন্ত্ৰণালয়ে মেটাৰ (ফেচবুক আৰু ইনষ্টাগ্ৰাম) ৰাজহুৱা নীতিৰ বিশ্বব্যাপী মুৰব্বীক মাতি আনে বুলি সূত্ৰই জনায় ।
উ্ল্লেখ কৰা প্ৰয়োজন যে, জুন মাহৰ শেষৰ পৰাই ৰাজধানী উত্তাল হৈছিল শিক্ষা ব্যৱস্থাৰ সংস্কাৰ আৰু কেন্দ্ৰীয় শিক্ষামন্ত্ৰীৰ পদত্যাগ দাবী কৰি । দেশজুৰি চলি থকা উত্তপ্ত পৰিস্থিতিৰ সময়তেই ছাত্ৰ-ছাত্ৰী আৰু অভিভাৱকৰ উদ্বেগক সম্বোধন কৰি মোদীয়ে গভীৰ নিশা সামাজিক মাধ্যমত প্ৰকাশ কৰিছিল এক ভিডিঅ’ বাৰ্তা । উক্ত বাৰ্তাটোৰ জৰিয়তে মোদীয়ে কয়, “বন্ধুসকল, মই জানো যে প্ৰশ্নকাকত ফাদিল হোৱাটো কোনো সৰু বিষয় নহয় । ই লাখ লাখ ছাত্ৰ-ছাত্ৰী আৰু তেওঁলোকৰ অভিভাৱকক অপৰিসীম যন্ত্ৰণা দিছে ।”
প্ৰধানমন্ত্ৰীয়ে কয় যে বিগত ডেৰ-দুমাহত চৰকাৰে প্ৰশ্নকাকত ফাদিলৰ বাবে দায়ীসকলৰ বিৰুদ্ধে কেইবাটাও পদক্ষেপ গ্ৰহণ কৰিছে ।মেটাই ভুলতে আঁতৰাই দিয়া এই ভিডিঅ’টোত তেওঁ পিছদিনা কেবিনেট বৈঠকত প্ৰশ্নকাকত ফাদিলৰ বিৰুদ্ধে কঠোৰ ব্যৱস্থা লোৱাৰ কথা ঘোষণা কৰিছিল । ২৮ জুলাইৰ পুৱা ফেচবুকে ভিডিঅ’টো আতঁৰোৱাৰ পূৰ্বে লাখ লাখ লোকে ভিডিঅ’টো চাইছিল ।
আন্দোলন চলি থকা সময়ত মাজনিশা পোষ্ট কৰা মোদীৰ এই ভিডিঅ’টোৱে এৰাতিৰ ভিতৰতে প্ৰধানমন্ত্ৰী মোদীৰ ইনষ্টাগ্ৰাম প্ৰফাইলত প্ৰায় ১০ লাখ ফ’ল’ৱাৰ সংযোগ কৰিবলৈ সক্ষম হৈছিল । যাৰ ফলত প্ৰধানমন্ত্ৰীগৰাকীৰ সামাজিক মাধ্যমত অনুৰাগীৰ সংখ্যা বৃদ্ধি হয় প্ৰায় ১০১ মিলিয়নলৈ ।
