অসমৰ বান পৰিস্থিতিক লৈ উদ্বিগ্ন হৈ পৰিছে বলীউডৰ অভিনেত্ৰী ভূমি পেডনেকাৰ । সামাজিক মাধ্যমযোগে বলিউডৰ অভিনেত্ৰীগৰাকীয়ে অসমৰ বন্যাৰ্তসকলৰ কাষত সমগ্ৰ দেশৰ জনসাধাৰণক থিয় হৈ সহায়-সহযোগিতা আগবঢ়াবলৈ আহ্বান জনাইছে ।
প্ৰলয়ংকাৰী বান সন্দৰ্ভত আলোকপাত কৰি অভিনেত্ৰীগৰাকীয়ে ইনষ্টাগ্ৰামত এটা ভিডিঅ’যোগে কয় যে লাখৰো অধিক লোক স্থানচ্যুত হৈছে, বহুলোকে জীৱন হেৰুৱাইছে আৰু একো একোখন গাঁও উটুৱাই লৈ গৈছে ।
সামাজিক মাধ্যমত এটা ভিডিঅ’ শ্বেয়াৰ কৰি ভূমিয়ে কয়- “নমস্কাৰ, দেশত কি হৈ আছে সেয়া আমি সকলোৱে জানো । আৰু শিক্ষাৰ্থীৰ সেই উৎসাহক মই চেল্যুট দিছো । কিন্তু দেশৰ এটা অংশত একাংশ লোক আছে যিসকলক আমাৰ সহায়-সহযগিতাৰ যথেষ্ট প্ৰয়োজন আছে । সেই অংশটো হ’ল অসম । অসমত অবৰ্ণনীয় বান হৈছে । পৰিস্থিতি ইমানেই বেয়া যে ৭.৫ লাখ লোক অন্য স্থানলৈ লৈ যোৱা হৈছে । ৪০ জনতকৈ অধিক লোকৰ মৃত্যু হৈছে আৰু মৃতকৰ সংখ্যা বাঢ়িছে ।”
অভিনেত্ৰীগৰাকীয়ে পুনৰ কয়, “সমগ্ৰ গাঁও বানত নিশ্চিহ্ন হৈছে, জীৱ-জন্তু উটি গৈছে । যি আছিল, সকলো শেষ হৈ গৈছে । বহুতেই এই সন্দৰ্ভত কোনো প্ৰতিক্ৰিয়া প্ৰকাশ কৰা নাই । পঞ্জাব, জম্মু, বিহাৰ, মহাৰাষ্ট্ৰ - আদিৰ সময়ত আমি যি সেৱাৰ মনোভাৱ দেখুৱালো সেই সময় আকৌ উভতি আহিছে । যোৱা বছৰ সমগ্ৰ দেশ দুৰ্গতসকলৰ কাষত থিয় হৈ আছিল । দান-বৰঙণি আগবঢ়োৱাৰ সেই সময়খিনি আকৌ উভতি আহিছে । আৰু এইবাৰ অসমক আমাৰ প্ৰয়োজন ।”
ভূমিয়ে সকলোকে খাদ্য, বিচনা, অনাময়, স্থান সলনি কৰা আদিৰ বাবে অনুদানৰ আগবঢ়াই দুৰ্গতসকলক সহায় কৰিবলৈ আহ্বান জনায় ।
বানাক্ৰান্তৰ দুৰ্দশাৰ বৰ্ণনা দি ভূমিয়ে কয়, "দৃশ্য দেখিলে আপোনাৰ হৃদয় ভাঙি যাব । দৃশ্যবোৰ অতি হৃদয় বিদাৰক আৰু অসমক সঁচাকৈয়ে আমাৰ সহায়ৰ প্ৰয়োজন । সকলোকে অনুৰোধ কৰিছো যিয়ে যিমান পাৰে দান কৰক । এই ভিডিঅ' বাৰ্তাটো অলপ শ্বেয়াৰ কৰি দিব যাতে আমাৰ সহায় অসমৰ ৰাইজৰ মাজলৈ যায় । জয় হিন্দ ।"
অভিনেত্ৰীগৰাকীয়ে ভিডিঅ’টোৰ শিৰোনাম দিছে এইদৰে — “বৰ্তমান বানত বুৰ গৈছে অসম, আপোনালোকে সদায় এনে বিপৰ্যয়ৰ সময়ত সহায়ৰ হাত আগবঢ়াই আহিছে, এইবাৰো তেওঁলোকৰ বাবে থিয় দিয়ক । #assam #flods।”
উল্লেখ কৰা প্ৰয়োজন যে, অসমত বানে ভয়াৱহ ৰূপ পৰিগ্ৰহ কৰিছে । মুখ্যমন্ত্ৰী ড৹ হিমন্ত বিশ্ব শৰ্মাই মাজনিশা সামাজিক মাধ্যম X ত এই তথ্য সদৰী কৰি কয় যে ৰাজ্যত বানত বৰ্তমানলৈ ৬২ জন লোকৰ মৃত্যু হৈছে ৷ ইয়াৰোপৰি বিস্তৰ কৃষি ভূমি, পশুধনৰ লগতে ব্যক্তিগত ধন-সম্পত্তিৰো বিস্তৰ ক্ষতিসাধন হৈছে ।
