শ্ৰীলংকাৰ প্ৰাক্তন ৰাষ্ট্ৰপতি মহিন্দা ৰাজাপাক্ষেক জৰুৰী চিকিৎসাৰ বাবে হাস্পতালত ভৰ্তি
শ্ৰীলংকাৰ প্ৰাক্তন ৰাষ্ট্ৰপতি মহিন্দা ৰাজাপাক্ষেক সোমবাৰে পুৱা জৰুৰী চিকিৎসাৰ বাবে হাস্পতালত ভৰ্তি কৰোৱা হৈছে। তেওঁৰ দল শ্ৰীলংকা পডুজানা পেৰামুনাই (SLPP) জনোৱা মতে তেওঁক নিবিড় চিকিৎসা কেন্দ্ৰ (ICU) ত ৰাখি পৰ্যবেক্ষণত ৰখা হৈছে।
স্থানীয় সংবাদ মাধ্যমৰ খবৰ অনুসৰি, ৮০ বছৰীয়া নেতাগৰাকীক কলম্বোৰ নাৱালোকা প্ৰাইভেট হাস্পতালত ভৰ্তি কৰোৱা হৈছে। তেওঁ কিৰুলাপোনেত থকা তেওঁৰ বাসগৃহত থকা অৱস্থাত হঠাৎ হৃদযন্ত্ৰজনিত সমস্যাত আক্ৰান্ত হোৱা বুলি ঘনিষ্ঠ সূত্ৰই জানিবলৈ দিছে। বৰ্তমান বিশেষজ্ঞ চিকিৎসকৰ এটা দলে তেওঁৰ চিকিৎসা কৰি আছে। bbff
উল্লেখযোগ্য যে, যোৱা কেইদিনমান ধৰি তেওঁৰ কেইবাটাও স্বাস্থ্য পৰীক্ষা কৰা হৈছিল বুলিও জানিব পৰা গৈছে। bbff
ৰাজাপাক্ষেৰ এই অসুস্থতাৰ খবৰ এনে সময়তে আহিছে যেতিয়া তেওঁৰ পৰিয়ালৰ বিৰুদ্ধে আইনী প্ৰক্ৰিয়া চলি আছে। তেওঁৰ পত্নী শিৰান্থী আৰু জ্যেষ্ঠ পুত্ৰ নামালৰ বিৰুদ্ধে আৰ্থিক অনিয়মৰ অভিযোগত তদন্ত চলি আছে।
মহিন্দা ৰাজাপাক্ষে ২০০৫ চনৰ পৰা ২০১৫ চনলৈ শ্ৰীলংকাৰ ৰাষ্ট্ৰপতি হিচাপে আৰু পিছত প্ৰধানমন্ত্ৰী হিচাপে কাৰ্যনিৰ্বাহ কৰিছিল। তেওঁৰ কাৰ্যকালত ২০০৯ চনত LTTE ৰ পৰাজয়ৰ জৰিয়তে দেশৰ তিনি দশকজোৰা গৃহযুদ্ধৰ অন্ত পৰিছিল।
