আমেৰিকাৰ বৈদেশিক মন্ত্ৰী মাৰ্কো ৰুবিঅ’ৱে অহা ৩০-৩১ অক্টোবৰত আটলাণ্টাত জি-২০ বৈদেশিক মন্ত্ৰীৰ বৈঠকৰ আয়োজন কৰিব। আমেৰিকাৰ বৈদেশিক দপ্তৰে মঙলবাৰে এই কথা জনায়।
দুই দিনীয়া এই বৈঠকত বিশ্বৰ আগশাৰীৰ অৰ্থনীতিৰ দেশসমূহৰ বৈদেশিক মন্ত্ৰীসকলে অংশগ্ৰহণ কৰিব আৰু উমৈহতীয়া অৰ্থনৈতিক আৰু সুৰক্ষাৰ প্ৰত্যাহ্বানৰ বিষয়ে আলোচনা কৰিব।
আমেৰিকাৰ বৈদেশিক দপ্তৰৰ মতে, ৰাষ্ট্ৰপতি ড’নাল্ড ট্ৰাম্পৰ নেতৃত্বত আমেৰিকাই জি-২০ক পুনৰ ইয়াৰ মূল অৰ্থনৈতিক লক্ষ্যলৈ ঘূৰাই আনিবলৈ বিচাৰিছে – যিয়ে বিকাশক আগুৱাই নিব, অৰ্থনৈতিক সুৰক্ষা শক্তিশালী কৰিব আৰু আমেৰিকান জনতাৰ বাবে ফলাফল কঢ়িয়াই আনিব।
বৈঠকত ভূ-ৰাজনৈতিক সংকটে বিশ্ব অৰ্থনীতিত পেলোৱা প্ৰভাৱ, নৌ-চলাচলৰ স্বাধীনতাৰ প্ৰতি ভাবুকি, শক্তি সুৰক্ষা, খাদ্য সুৰক্ষা আৰু যোগান শৃংখলাৰ বিষয়ত আলোচনা হোৱাৰ সম্ভাৱনা আছে।
এই বৈঠক ১৪-১৫ ডিচেম্বৰত মায়ামিৰ ট্ৰাম্প নেচনেল ডোৰাল ৰিজৰ্টত অনুষ্ঠিত হ’বলগীয়া জি-২০ শীৰ্ষ সন্মিলনৰ প্ৰস্তুতি হিচাপে অনুষ্ঠিত হ’ব। ভাৰতৰ বৈদেশিক মন্ত্ৰী এছ জয়শংকৰেও এই বৈঠকত অংশগ্ৰহণ কৰিব বুলি জানিব পৰা গৈছে।
