আমেৰিকাৰ ন্যায়াধীশে কেলিফৰ্নিয়াৰ মধ্যৱৰ্তী নিৰ্বাচনত ট্ৰাম্প প্ৰশাসনৰ হস্তক্ষেপ নাকচ কৰিলে
আমেৰিকাৰ কেলিফৰ্নিয়াৰ মধ্যৱৰ্তী নিৰ্বাচনৰ প্ৰাকমুহূৰ্তত এক ডাঙৰ ৰায় দিছে আদালতে। ফেডাৰেল ন্যায়াধীশ ডেভিড অ’ কাৰ্টাৰে বুধবাৰে ট্ৰাম্প প্ৰশাসনৰ ন্যায় বিভাগৰ আবেদন নাকচ কৰে।
ন্যায় বিভাগে অভিযোগ কৰিছিল যে কেলিফৰ্নিয়াৰ ভোটাৰ তালিকাত ১ লাখ ৯০ হাজাৰ অবৈধ ভোটাৰ আছে, পিছত সেই সংখ্যা ২০ হাজাৰলৈ হ্ৰাস কৰি সেই ভোটাৰসকলৰ বেলট জব্দ কৰিবলৈ জৰুৰী গোচৰ দাখিল কৰিছিল। আদালতে এই পদক্ষেপক “নিৰ্লজ্জ নিৰ্বাচনী হস্তক্ষেপ” বুলি সমালোচনা কৰে।
ৰায়ত ন্যায়াধীশ কাৰ্টাৰে কয়, “আমেৰিকাৰ ইতিহাসত আজিলৈকে কেতিয়াও ফেডাৰেল চৰকাৰে নিৰ্বাচনৰ প্ৰাকমুহূৰ্তত ৰাজ্য চৰকাৰক নিজৰ সাংবিধানিক নিৰ্বাচনী প্ৰক্ৰিয়া ত্যাগ কৰি কাৰ্যবাহী শাখাৰ ইচ্ছাৰ ওচৰত নত হ’বলৈ বাধ্য কৰা নাই।”
তেওঁ লগতে কয় যে ভোটাৰ তালিকাত থকা নাগৰিকসকলক অনিশ্চয়তা আৰু ভুলেৰে ভৰা প্ৰক্ৰিয়াৰ পৰা উদ্ভৱ হোৱা ভিত্তিহীন অভিযোগৰ বাবে তেওঁলোকৰ মৌলিক অধিকাৰৰ পৰা বঞ্চিত কৰিব নোৱাৰি।
এই গোচৰটোৱে ৩ নৱেম্বৰৰ মধ্যৱৰ্তী নিৰ্বাচনৰ আগত তীব্ৰ বিতৰ্কৰ সৃষ্টি কৰিছে, য’ত ট্ৰাম্পৰ ৰিপাব্লিকান পাৰ্টিয়ে কংগ্ৰেছৰ নিয়ন্ত্ৰণ হেৰুৱাৰ আশংকাত আছে। ন্যায় বিভাগে ইতিমধ্যে এই ৰায়ৰ বিৰুদ্ধে ছান ফ্ৰান্সিস্কোৰ আপীল আদালতত আপীল দাখিল কৰিছে।
