দেশৰ বজাৰত সোণৰ মূল্যত পতনৰ ধাৰা অব্যাহত আছে । একেৰাহে তৃতীয় দিনৰ বাবে সোণৰ দাম হ্ৰাস পোৱাৰ বিপৰীতে ৰূপৰ মূল্যত দেখা গৈছে উত্থান। আন্তঃৰাষ্ট্ৰীয় বজাৰত মধ্যপ্ৰাচ্যৰ উত্তেজনা, ক্ৰুড অইলৰ মূল্যবৃদ্ধি আৰু আমেৰিকাৰ মুদ্ৰাস্ফীতিৰ তথ্যক কেন্দ্ৰ কৰি সৃষ্টি হোৱা অনিশ্চয়তাই মূল্যৱান ধাতুৰ বজাৰত প্ৰভাৱ পেলাইছে।
তথ্য অনুসৰি, বুধবাৰে ৰাজধানী দিল্লীত ৯৯.৯ শতাংশ বিশুদ্ধ সোণৰ দাম ১০০ টকা হ্ৰাস পাই প্ৰতি ১০ গ্ৰামত ১,৫৮,০০০ টকা হয়। ইয়াৰ পূৰ্বৰ দিনটোত এই দাম আছিল ১,৫৮,১০০ টকা।
আনহাতে, খুচুৰা বজাৰৰ শেহতীয়া হাৰৰ হিচাপত ২২ কেৰেট সোণৰ দাম প্ৰতি গ্ৰামত প্ৰায় ১৪,১৫৯ টকা, আনহাতে ২৪ কেৰেট সোণৰ দাম প্ৰতি গ্ৰামত প্ৰায় ১৫,৪৩১ টকা পৰ্যন্ত দেখা গৈছে। অৱশ্যে চহৰ, জুৱেলাৰ আৰু কৰ অনুসৰি গ্ৰাহকে পৰিশোধ কৰিবলগীয়া চূড়ান্ত দামৰ কিছু তাৰতম্য হ’ব পাৰে।
সোণৰ বিপৰীতে ৰূপৰ দাম প্ৰতি কিলোগ্ৰামত ২,৩০০ টকা বৃদ্ধি পাই ২,৪৩,৪০০ টকা হয়। মঙলবাৰে এই দাম আছিল ২,৪১,১০০ টকা। আন্তঃৰাষ্ট্ৰীয় বজাৰত ৰূপৰ দামো প্ৰায় ১ শতাংশ বৃদ্ধি পাই প্ৰতি আউন্সত ৬৬.২৫ ডলাৰ হয়।
বিশ্ব বজাৰত সোণৰ দামত চাপ সৃষ্টি কৰা অন্যতম কাৰণ হৈছে মধ্যপ্ৰাচ্যৰ উত্তেজনা। সংঘাত বৃদ্ধি পোৱাৰ ফলত ক্ৰুড অইলৰ দাম বৃদ্ধি পাইছে। বৰ্তমান সোণৰ বজাৰৰ পৰৱৰ্তী দিশ নিৰ্ধাৰণত আমেৰিকাৰ মুদ্ৰাস্ফীতিয়ে গুৰুত্বপূৰ্ণ ভূমিকা ল’ব বুলি ধাৰণা কৰা হৈছে।
