প্ৰতিবাদকাৰী ছাত্ৰৰ বাটত বাধা নিদিব, তেওঁলোক ভাৰতৰ কণ্ঠস্বৰ: প্ৰধানমন্ত্ৰী মোদীক ৰাহুল গান্ধীৰ আহ্বান
নতুন দিল্লী: প্ৰতিবাদকাৰী ছাত্ৰ-ছাত্ৰীৰ পথত বাধাৰ সৃষ্টি নকৰিবলৈ প্ৰধানমন্ত্ৰী নৰেন্দ্ৰ মোদীক আহ্বান জনালে লোকসভাৰ বিৰোধী দলপতি তথা কংগ্ৰেছ নেতা ৰাহুল গান্ধীয়ে।
বুধবাৰে ছ’চিয়েল মিডিয়া প্লেটফৰ্ম এক্সত এটা পোষ্ট যোগে ৰাহুল গান্ধীয়ে কয় যে, আজি যিসকল ছাত্ৰ-ছাত্ৰীয়ে প্ৰতিবাদ কৰি আছে, তেওঁলোকেই হৈছে ভাৰতৰ ভৱিষ্যৎ আৰু ভাৰতৰ কণ্ঠস্বৰ। তেওঁলোকক বাধা দিয়া উচিত নহয়।
ৰাহুল গান্ধীয়ে লগতে কয় যে, ছাত্ৰসকলে যি কথা কৈছে সেয়া মনোযোগেৰে শুনা উচিত। গণতন্ত্ৰত প্ৰতিবাদ কৰাৰ অধিকাৰ সকলোৰে আছে।
শেহতীয়াকৈ দেশৰ বিভিন্ন বিশ্ববিদ্যালয়ত ছাত্ৰৰ প্ৰতিবাদ তীব্ৰতৰ হৈ উঠাৰ পৰিপ্ৰেক্ষিতত ৰাহুল গান্ধীৰ এই মন্তব্যই বিশেষ তাৎপৰ্য বহন কৰিছে। তেওঁৰ এই মন্তব্যৰ পাছতে ৰাজনৈতিক মহলত ব্যাপক চৰ্চা আৰম্ভ হৈছে।
