আফগানিস্তান-পাকিস্তানৰ সংঘাত তুংগত: কূটনীতিৰে সমাধান বিচাৰে তালিবানে, পাকিস্তানৰ যুদ্ধৰ হুংকাৰ
পাকিস্তান আৰু আফগানিস্তানৰ মাজত সীমান্ত সংঘাত আৰু কূটনৈতিক বাকযুদ্ধ তীব্ৰতৰ হৈ উঠিছে। আফগানিস্তানৰ তালিবান চৰকাৰৰ বৈদেশিক মন্ত্ৰী আমিৰ খান মুত্তাকীয়ে কয় যে পাকিস্তানৰ সৈতে থকা সমস্যাসমূহ যুদ্ধৰে নহয়, কূটনীতিৰ জৰিয়তেহে সমাধান কৰিব লাগে।
মুত্তাকীয়ে পাকিস্তানৰ সেনাক তীব্ৰ সমালোচনা কৰি কয়, “ৰাজনৈতিক বুজাবুজি বিচৰাৰ সলনি, পাকিস্তানৰ শক্তিশালী সেনাই আফগানিস্তানৰ সৈতে সম্পৰ্কৰ ক্ষেত্ৰত কেৱল সামৰিক ভাষাহে ব্যৱহাৰ কৰে আৰু আন্তৰ্জাতিক আইন উলংঘা কৰি আক্ৰমণ চলাইছে।”
তেওঁ লগতে হুংকাৰ দি কয় যে, “যিকোনো আক্ৰমণৰ বিৰুদ্ধে আত্মৰক্ষা কৰাটো কাবুলে নিজৰ বৈধ আৰু অনস্বীকাৰ্য অধিকাৰ বুলি বিবেচনা কৰে।”
আনহাতে পাকিস্তানৰ বৈদেশিক মন্ত্ৰালয়ে এক বিবৃতিত কয় যে অনুষ্ঠানটোত তেওঁলোকৰ প্ৰতিনিধিয়ে সীমান্তৰ সিপাৰৰ পৰা সন্ত্ৰাসবাদক সমূলে উৎখাত কৰাৰ প্ৰতিশ্ৰুতি দিছে আৰু তালিবানক “তেওঁলোকৰ মাটিৰ পৰা সন্ত্ৰাসবাদী গোটসমূহে যি দায়মুক্তিৰে কাম কৰি আছে, সেয়া বন্ধ কৰিবলৈ” আহ্বান জনাইছে।
উল্লেখ্য যে, পাকিস্তান আৰু আফগানিস্তান উগ্ৰবাদক লৈ দীৰ্ঘদিন ধৰি মতানৈক্যত আছে। ইছলামাবাদে কাবুলক সীমান্তৰ সিপাৰে আক্ৰমণ চলোৱা টিটিপি উগ্ৰবাদীক আশ্ৰয় দিয়াৰ অভিযোগ উত্থাপন কৰিছে। তালিবান চৰকাৰে এই অভিযোগ অস্বীকাৰ কৰে আৰু কয় যে উগ্ৰবাদ পাকিস্তানৰ আভ্যন্তৰীণ সমস্যা।
