অসম চৰকাৰৰ ক্ৰীড়া আৰু যুৱ কল্যাণ বিভাগৰ বিশেষ উদ্যোগত ৰাজ্যজুৰি আৰম্ভ হোৱা এই মহা ক্ৰীড়া মহোৎসৱে এতিয়া নগাঁও জিলাতো তোলপাৰ লগাইছে।
৭ নৱেম্বৰৰ পৰা জিলাখনৰ চৌদিশে, প্ৰতিখন নিৰ্বাচিত খেলপথাৰত গাঁও পঞ্চায়ত পৰ্যায়ৰ প্ৰতিযোগিতাৰ ৰণডংকা বাজিছে।
১৬৪টা গাঁও পঞ্চায়ত + ৪টা পৌৰসভা = এটাই উৎসৱ!
তৃণমূলৰ পৰা প্ৰতিভা বিচাৰি অনাৰ লক্ষ্যৰে আয়োজিত এই বৃহৎ সমাৰোহ নগাঁও জিলাৰ মুঠ ১৬৪টা গাঁও পঞ্চায়ত আৰু ৪টা পৌৰসভা অঞ্চলত সম্পূৰ্ণ উৎসাহ-উদ্দীপনাৰে চলি আছে।
ৰূপহীহাটৰ আলিটাঙনীত জিলা আয়ুক্ত
সোমবাৰে ৰূপহীহাট বিধানসভা সমষ্টিৰ আলিটাঙনী খেলপথাৰত উপস্থিত হয় নগাঁও জিলা আয়ুক্ত আৰণ্যক শইকীয়া।
খেলপথাৰত ভৰি দিয়েই তেওঁ উদীয়মান খেলুৱৈসকলক উদ্দেশ্যি কয় —
“ক্ৰীড়াই কেৱল শৰীৰক সুস্থ নকৰে, মনকো শক্তিশালী কৰে। গাঁৱৰ প্ৰতিটো কোণত লুকাই থকা প্ৰতিভাক ৰাষ্ট্ৰীয় আৰু আন্তঃৰাষ্ট্ৰীয় মঞ্চলৈ লৈ যোৱাৰ শক্তিশালী মাধ্যম হৈছে খেল মহাৰণ।”
ইয়াৰ পাছতে আয়ুক্তগৰাকীয়ে পতাকা জোকাৰি ২০০ মিটাৰ দৌৰ প্ৰতিযোগিতাৰ আনুষ্ঠানিক শুভ উদ্বোধন কৰে।
ফুটবলকে ধৰি বিভিন্ন ক্ৰীড়াত অংশ লোৱা যুৱ খেলুৱৈসকলৰ সৈতে মত-বিনিময় কৰি তেওঁলোকক উৎসাহিতও কৰে আয়ুক্তগৰাকীয়ে।
দৌৰৰ গতি, ফুটবলৰ টেংকা, দৰ্শকৰ হাতচাপৰি — আলিটাঙনী এতিয়া যেন সঁচাকৈয়ে খেলৰ মহাৰণ!
