দিল্লী উচ্চ ন্যায়ালয়ে আজি Cockroach Janta Party (CJP) ৰ দুই নেতা সৌৰভ দাস আৰু আশুতোষ ৰাংকাক কঠোৰভাৱে সমালোচনা কৰে। জন্তৰ-মন্তৰত বেৰিকেড ভাঙি প্ৰৱেশ কৰাৰ অভিযোগত তেওঁলোকৰ ন্যায়িক জিম্মা বৃদ্ধিৰ বিৰুদ্ধে দাখিল কৰা আবেদনৰ শুনানিৰ সময়ত ন্যায়াধীশ সুব্ৰমনিয়াম প্ৰসাদে এই মন্তব্য কৰে।
আদালতে কয়, “বেৰিকেডৰ এটা উদ্দেশ্য আছে। যেতিয়া আপুনি বেৰিকেড ভাঙে, তেতিয়া আৰু ১০-২০ জন লোকে আইন উলংঘন কৰাৰ সম্ভাৱনা থাকে। আপোনালোকে শান্তি বণ্ড ভংগ কৰিছে।”
জানিব পৰা মতে, দুয়ো নেতাই ১১ অক্টোবৰত ৫০ হাজাৰ টকাৰ বণ্ডত মুক্তি পাইছিল, কিন্তু ১৩ অক্টোবৰত পুনৰ নিষিদ্ধ জন্তৰ-মন্তৰত প্ৰৱেশ কৰি ত্ৰিৰংগা উত্তোলনৰ চেষ্টা কৰে। আৰক্ষীয়ে তেওঁলোকক BNSS ৰ ১৬৩ ধাৰাৰ অধীনত গ্ৰেপ্তাৰ কৰে।
শুনানিৰ সময়ত আদালতে তেওঁলোকৰ বয়সক লৈও প্ৰশ্ন কৰে। অধিবক্তা অভিক চিমনিয়ে জনায় যে সৌৰভ ২৭ বছৰীয়া আৰু ৰাংকা ৩২ বছৰীয়া, তেতিয়া আদালতে কয়, “আপোনালোক Gen Z নহয়।”
আদালতে লগতে কয় যে প্ৰতিবাদৰ বাবে আৰক্ষীৰ অনুমতি কেৱল বাধা দিয়াৰ বাবে নহয়, বাহিৰৰ অবাঞ্ছিত লোকে প্ৰতিবাদ বেয়া কৰাটো ৰোধ কৰিবলৈহে দিয়া হয়। শেষত দুয়ো নেতাই আবেদন প্ৰত্যাহাৰ কৰে।
