অসমৰ ৰাজনীতিৰ বাবে অতি গুৰুত্বপূৰ্ণ দিন কাইলৈ। কাইলৈ ৬ অক্টোবৰত অনুষ্ঠিত হ’ব নগাঁও লোকসভা সমষ্টিৰ উপ-নিৰ্বাচন। এই উপ-নিৰ্বাচনত মুঠ ১৫ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে আৰু কাইলৈ নিৰ্ণয় হ’ব তেওঁলোকৰ ভাগ্য।
পুৱা ৭ বজাৰ পৰা ভোটগ্ৰহণ আৰম্ভ হ’ব আৰু বিয়লি ৫ বজালৈ চলিব। জিলা প্ৰশাসনে জনোৱা অনুসৰি সমষ্টিটোৰ প্ৰতিটো ভোটকেন্দ্ৰতে নিৰাপত্তা ব্যৱস্থা কটকটীয়া কৰা হৈছে। স্পৰ্শকাতৰ ভোটকেন্দ্ৰসমূহত অতিৰিক্ত বাহিনী মোতায়েন কৰা হৈছে। ভোটাৰসকলে যাতে শান্তিপূৰ্ণভাৱে ভোটাধিকাৰ সাব্যস্ত কৰিব পাৰে তাৰ বাবে সকলো ব্যৱস্থা গ্ৰহণ কৰা হৈছে।
এই নিৰ্বাচনক ২০২৬ৰ বিধানসভা নিৰ্বাচনৰ ছেমি-ফাইনেল বুলি অভিহিত কৰা হৈছে। শাসক মিত্ৰজোঁট আৰু বিৰোধী ঐক্যমঞ্চ উভয়ে এই আসনখন জয় কৰিবলৈ মৰণপন যুঁজ দিছে। প্ৰচাৰৰ অন্তিম দিনটোত দুয়ো পক্ষই শক্তি প্ৰদৰ্শন কৰে।
এতিয়া সকলোৰে দৃষ্টি ভোটদানৰ হাৰৰ ওপৰত। কাইলৈ EVM ত বন্দী হ’ব ১৫ গৰাকী প্ৰাৰ্থীৰ ভাগ্য, যাৰ ফলাফল ঘোষণা কৰা হ’ব অহা ৯ অক্টোবৰত।
