আগন্তুক উপ-নিৰ্বাচন সুচাৰুৰূপে অনুষ্ঠিত কৰাৰ বাবে মৰিগাঁও জিলা প্ৰশাসনে গ্ৰহণ কৰা প্ৰস্তুতিৰ বুজ ল’লে অসমৰ মুখ্য নিৰ্বাচনী বিষয়া (CEO) অনুৰাগ গোৱেলে। মঙলবাৰে মৰিগাঁও জিলাত উপস্থিত হৈ মুখ্য নিৰ্বাচনী বিষয়াগৰাকীয়ে নিৰ্বাচনী প্ৰস্তুতিৰ বিভিন্ন দিশ পৰ্যালোচনা কৰে।
মৰিগাঁও জিলা আয়ুক্তৰ কাৰ্যালয়ৰ সন্মিলন কক্ষত মুখ্য নিৰ্বাচনী বিষয়াৰ অধ্যক্ষতাত এখন পৰ্যালোচনা বৈঠক অনুষ্ঠিত হয়। বৈঠকত মৰিগাঁৱৰ জিলা আয়ুক্ত সৃষ্টি সিং, IAS-এ জিলাখনৰ নিৰ্বাচনী প্ৰস্তুতি আৰু প্ৰশাসনৰ বিভিন্ন ব্যৱস্থাৰ বিষয়ে মুখ্য নিৰ্বাচনী বিষয়াগৰাকীক অৱগত কৰে।
বৈঠকত উপ-নিৰ্বাচন সুচাৰুৰূপে সম্পন্ন কৰাৰ বাবে গ্ৰহণ কৰা প্ৰশাসনিক আৰু লজিষ্টিক ব্যৱস্থা, EVMৰ মোতায়েন, নিৰ্বাচন সম্পৰ্কীয় বিভিন্ন কোষৰ কাম-কাজ আৰু সংশ্লিষ্ট বিভাগসমূহৰ মাজত সমন্বয়ৰ বিষয়ে বিতংভাৱে পৰ্যালোচনা কৰা হয়।
মুখ্য নিৰ্বাচনী বিষয়া অনুৰাগ গোৱেলে সংশ্লিষ্ট বিষয়াসকলক নিৰ্ধাৰিত সময়ৰ ভিতৰত সকলো প্ৰস্তুতি সম্পূৰ্ণ কৰিবলৈ নিৰ্দেশ দিয়ে। লগতে ভাৰতীয় নিৰ্বাচন আয়োগে জাৰি কৰা সকলো নিৰ্দেশনা আৰু নীতি-নিৰ্দেশ কঠোৰভাৱে পালন কৰি উপ-নিৰ্বাচন শান্তিপূৰ্ণ আৰু সুচাৰুৰূপে অনুষ্ঠিত কৰাৰ বাবে প্ৰয়োজনীয় ব্যৱস্থা গ্ৰহণ কৰিবলৈ বিষয়াসকলক আহ্বান জনায়।
বৈঠকত মৰিগাঁও জিলাৰ উন্নয়ন আয়ুক্ত অৰ্পা বাগলাৰী, ACS, জিলা পৰিষদৰ মুখ্য কাৰ্যবাহী বিষয়া সত্যজিৎ চেতিয়া, ACS, অতিৰিক্ত জিলা আয়ুক্তসকল, সহকাৰী আয়ুক্তসকল, নিৰ্বাচনী বিষয়া, চক্ৰ বিষয়াসকল, EVM বিষয়াসকল আৰু বিভিন্ন নিৰ্বাচনী কোষৰ দায়িত্বত থকা বিষয়াসকল উপস্থিত থাকে।
আগন্তুক উপ-নিৰ্বাচনক কেন্দ্ৰ কৰি মৰিগাঁও জিলা প্ৰশাসনে প্ৰস্তুতি ত্বৰান্বিত কৰাৰ সময়তে মুখ্য নিৰ্বাচনী বিষয়াৰ এই পৰ্যালোচনা ভ্ৰমণে নিৰ্বাচনী ব্যৱস্থাপনা অধিক শক্তিশালী কৰাৰ দিশত গুৰুত্ব লাভ কৰিছে।
