বুধবাৰে স্বগৃহত উপস্থিত হৈছে বক্সাৰ লাভলিনা বৰগোহাঁই ।কমনৱেলথ গেমছ ২০২৬ত ৰূপৰ পদক বিজয়ী অসমৰ গৌৰৱ, বক্সাৰ লাভলিনা বৰগোহাঁই বৰঝাৰ বিমানবন্দৰ উপস্থিত হোৱাৰ লগে লগে বিভিন্নজনে উষ্ম আদৰণি জনায় । উল্লেখ্য যে, ইতিমধ্যে অন্ত পৰিছে স্কটলেণ্ডৰ গ্লাছগ’ত অনুষ্ঠিত হোৱা ২০২৬ বৰ্ষৰ কমনৱেলথ গেমছ ৷ এই প্ৰতিযোগিতাত ভাৰতে ৩৯টা পদক অৰ্জন কৰিবলৈ সক্ষম হৈছে ৷ অসম গৌৰৱ তথা অলিম্পিক পদক বিজয়ী বক্সাৰ লাভলীনা বৰগোহাঁয়েও কমনৱেলথ গেমছত ৰূপৰ পদক অৰ্জন কৰি দেশৰ লগতে ৰাজ্যখনলৈকো গৌৰৱ কঢ়িয়াই আনিছে ৷
অসমলৈ অহাৰ পূৰ্বে কমনৱেলথ গেমছৰ ৰূপৰ পদক বিজয়ী অসমীয়া বক্সাৰ লাভলিনাক সাক্ষাৎ কৰে দিল্লীৰ শিক্ষা তথা ক্ৰীড়া মন্ত্ৰী আশীষ সুদে । তেওঁ খেলুৱৈগৰাকীক চৰকাৰৰ হৈ ক্ৰীড়াৰ আন্তঃগাঁথনি উন্নত কৰাত সহায় কৰাৰ প্ৰতিশ্ৰুতি প্ৰদান কৰে ।
কৃতিত্বৰ বাবে অভিনন্দন জনাই মন্ত্ৰী সুদে কয় যে চৰকাৰে দেশৰ ৰাজধানী চহৰখনত ক্ৰীড়াৰ সা-সুবিধা উন্নত কৰাৰ লগতে উদীয়মান খেলুৱৈসকলৰ বাবে সুযোগ বৃদ্ধিৰ বাবে কাম কৰিব ।
উল্লেখ কৰা প্ৰয়োজন যে, দেওবাৰে ১১ দিনীয়াকৈ অনুষ্ঠিত কমনৱেলথ গেমছ ২০২৬ৰ সামৰণি পৰে ৷ ভাৰতে ১৩টা সোণ, ১৭টা ৰূপ আৰু ৯টা ব্ৰঞ্জৰ সৈতে ৩৯টা পদকৰে প্ৰতিয়োগিতাখনত চতুৰ্থ স্থান দখল কৰে ৷
২০৩০ বৰ্ষৰ কমনৱেলথ গেমছ হ’ব শতবাৰ্ষিকী সংস্কৰণ আৰু ভাৰতক এই প্ৰতিযোগিতাখন আয়োজনৰ অধিকাৰ প্ৰদান কৰা হৈছে ৷ গুজৰাটৰ আহমেদাবাদত ২০৩০ চনৰ কমনৱেলথ গেমছ অনুষ্ঠিত হ’ব বুলি জানিব পৰা গৈছে ৷